ಹೀಗೊಮ್ಮೆ ಯೋಚಿಸಿಬಿಟ್ಟರೆ...

ಥತ್!

ಹೀಗೊಮ್ಮೆ ಯೋಚಿಸಿಬಿಟ್ಟರೆ
ಅಲ್ಲಿಗೇ ಮುಗಿಯುವುದಿಲ್ಲ.
ತಲೆ ಕೆಡಿಸಿಕೊಂಡು
ಕೂತು-ಬರೆದು-ತಿದ್ದಿ
ಅವಳಿಂದ,ಅವರಿಂದ ಓದಿಸಿ
ಉಸಿರು ಕಟ್ಟಿಕೊಂಡು ಕಾದು
ಚಪ್ಪಾಳೆ ಗಿಟ್ಟಿಸಿ ಹಿಗ್ಗಬೇಕು!

ಬರೀ ಹುಟ್ಟಿಬಿಟ್ಟರೆ ಆಗುವುದಿಲ್ಲ ಸ್ವಾಮೀ!
ಕೂದಲು ಬೆಳೆಸಿಕೊಳ್ಳುತ್ತ ದೊಡ್ಡವರಾಗಿ
ಕಲಿತು ಕೆಲಸ ಹುಡುಕಿ
ಮದುವೆ ಮುಂಜಿ ಮಾಡಿಕೊಂಡು
ಸೂರು ಸಂಸಾರ ಕಟ್ಟಿಕೊಂಡು
ರಾಮ-ಶಿವ ಅನ್ನಬೇಕು
ಹತ್ತಬೇಕು,ಇಳಿಯಬೇಕು
ತುಳಿಯಬೇಕು,ತುಳಿಸಿಕೊಳ್ಳಬೇಕು
ನಗಬೇಕು,ಅಳಬೇಕು
ಜೊತೆಗೇ ಇನ್ನೂ ಏನೇನೋ...
ಕೊನೆಗೆ ಸಾಯುವುದೂ ಕಡ್ಡಾಯವೇ!

ಒಂದರ ಬೆನ್ನಿಗೆ ಎಷ್ಟೊಂದು ಹಲವುಗಳು!

ಬೇಕಾದ್ದು
ಕಾಳಸಂತೆಯಲ್ಲಿ ಬಿಡಿ ಬಿಡಿಯಾಗಿ
ಅಥವಾ ಸೂಳೆಯ ಬಳಿ ಕ್ಷಣಿಕವಾಗಿ
ಸಿಗುವಂತೆ
ಸಿಕ್ಕಿಬಿಡುತ್ತಿದ್ದರೆ ಎಷ್ಟು ಚೆನ್ನಾಗಿರುತ್ತಿತ್ತು!