ಆದರ್ಶಗಳ
ಪಾಪಸ್ ಕಳ್ಳಿ
ಬೇಲಿಯಲಿ
ಸಮೃದ್ಧ!

*********

ಮನುಷ್ಯ
ತಾನು ಮನುಷ್ಯನೆಂದು
ಗೊತ್ತಾಗುವತನಕ
ಚೆನ್ನಾಗಿಯೇ ಬದುಕಿದ್ದನಂತೆ!


**********

ಅವನು ಎಷ್ಟೋ ದಿನ
ಅಲ್ಲೇ ಕೂತು ಬರೆದಿದ್ದ,
ಗುಂಡಿ ತೋಡಿ
ಮಲಗಿರಲಿಲ್ಲ ಅಷ್ಟೇ!

ಆ ದೇಶದಲ್ಲೊಮ್ಮೆ
ಕಳವಾಗಿ
ಕೆಲವರು ಕದ್ದು
ಕೆಲವರು ಕಳಕೊಂಡು
ಕಳೆದಿದ್ದ ಕದ್ದು
ಕದ್ದಿದ್ದ ಕಳಕೊಂಡು
ಕಳುವೇ ರಾಜನೀತಿಯಾಗಿ
ಕಳಕೊಳ್ಳಲು ಏನೂ ಇರದ
ಕದಿಯದ ಭ್ರಷ್ಟರ
ಜೀವ ಕದಿಯಲು
ತೀರ್ಮಾನಿಸಲಾಯಿತು!!!

ಕೈಯಾರೆ ನೆಟ್ಟ
ಬಾಳೆಗಿಡಕ್ಕೆ ಬಿಟ್ಟ
ಕೊನೆಯಲ್ಲಿ
ಆತ್ಮ ಕಂಡಿತು.
ಪ್ರವಚನಗಳಲ್ಲಿ
ನನಗೆ ಆಸಕ್ತಿಯಿಲ್ಲ...

ಬದ್ಧತೆ
ಆಡಂಬರ
ಬೇರೆ ಬೇರೆ-
ಯೆಂದು ಬಾಯಿಬಿಟ್ಟು
ಹೇಳಲೇಬೇಕಾಗಿ
ಬಂದಿದೆ,
ಕಿವಿಗೆ ಬಿಡಲು
ಎಣ್ಣೆ ಕೊಡಿ!

ಹಳ್ಳಿಮನೆ
ತೋಟ ದನಕರು
ಮಾರಿ
ಪೇಟೆ ಸೇರಿದವರಿಂದ
ದೋಷ-
ಪರಿಹಾರಕ್ಕಾಗಿ
ಭರ್ಜರಿ 
ಶಾಂತಿ,ಕಥೆ!!!

ಎಣ್ಣೆ ಹಚ್ಚಿ

ಕ್ರಾಪು ಬಾಚಿ

ಬರಿಗಾಲಲ್ಲಿ ಬಸ್ಸು ಹತ್ತಿ

ಶಾಲೆಗೆ ಹೊರಟವನ

ಜಿಪ್ಪಿಲ್ಲದ ಬ್ಯಾಗಿನ ಮೇಲೆ

ಸ್ವರಚಿತ ಭಾರತ

ನಕಾಶೆ!

ಫೋಟೋ
ನೋಟುಗಳಲ್ಲಿ
ನಗುತ್ತ ಬಂಧಿಯಾದ
ಗಾಂಧಿಗೇ
ಸ್ವಾತಂತ್ರ್ಯವಿಲ್ಲ,
ಇನ್ನು ಕನಸುಗಳನ್ನು
ನೆನಪಿಸಬೇಡಿ!

ಬೆಂಕಿ ಮತ್ತು ಧರ್ಮ
ಸುಟ್ಟ ಮೇಲೇ
ಗೊತ್ತಾಗುವುದು
ಸುಡುತ್ತದೆಂದು.
ಗೊತ್ತಾಗ-
ದಿದ್ದರೆ ಕಾಣೋದಿಲ್ಲ
ನೀರಾವಿ!!!

ನಾನಿಲ್ಲಿ ಹೀಗೆ ಗೀಚುತ್ತಿರುವಾಗಲೇ
ಅಲ್ಲಿ
ಅವಳ ಕನಸು
ಅವನ ಸೆಮಿನಾರು
ಹಾರುವ ನೊಣ
ಕಾಣದ ಗಾಳಿ
ಉದುರುವ ಎಲೆ
ಬೀಸಿದ ಕಲ್ಲು
ತಪ್ಪುವ ಗುರಿ
ಒಡೆಯಲಿರುವ ಗಾಜು...
ಎಲ್ಲ ಹಾಗೇ ಇರುವಾಗ
ಹೇಳು
ಫಿಲಾಸಫಿ ಕ್ಲಾಸಿನಲ್ಲಿ
ನೀನು ಹೇಳಿದಂತಾಗಲು
ನನಗೆ ಹೇಗೆ ಸಾಧ್ಯ?!