ಉಪಾಯ-ದೌರ್ಬಲ್ಯ

ನಿಜ. ನಿನಗೆ
ನಿಷ್ಠನಾಗದಿರುವುದೇ ನನ್ನ
ಉಪಾಯ ಮತ್ತು
ದೌರ್ಬಲ್ಯ.

ಎಡವಿದ ಮೇಲೆ ಹಿಡಿದ ದಾರಿ
ಹುಡುಕುತ್ತಿದ್ದುದಲ್ಲವೆಂಬ ಸಂಶಯ
ದಾರಿ ತಪ್ಪಿದವ ಇಂಗ್ಲೀಷಿನಲ್ಲಿ
ದಾರಿ ಕೇಳಿದಾಗ
ಬಂದರೂ ಬಾರದಂತೆ
ಹೆಜ್ಜೆ ಹಾಕುವುದು ನನ್ನ
ಉಪಾಯ ಅಥವಾ
ದೌರ್ಬಲ್ಯ.

ನಕ್ಷತ್ರದಿಂದ ನಕ್ಷತ್ರಕ್ಕೆ
ಗೆರೆಯೆಳೆದು ರಂಗೋಲಿ ಹಾಕಿ
ಉಪಗ್ರಹ  ಸುತ್ತಾಡಿ
ಇಷ್ಟೆಂದರೆ ಇಷ್ಟೆಂದು
ನಕ್ಷತ್ರಿಕರೆಲ್ಲ ಬಡಕೊಂಡರೂ
ಬರಿಗೈಯಿಂದ ಗೆರೆ-
ಯೆಳೆದುಕೊಳ್ಳುವುದು ಅವರವರ
ಉಪಾಯ ಮತ್ತು
ದೌರ್ಬಲ್ಯ!

ತೊಟ್ಟಿ ತುಂಬಿ ತುಳುಕುವಾಗ
ನಾಯಿ ರಾಗ ತೆಗೆವ ಮುನ್ನ
ಎಂಜಲು ಕೈ ತೊಳೆಯದೇ
ಮೂಸಿ ಮೂಸಿ ಒಮ್ಮೆಯಾದರೂ
ರುಚಿ ನೋಡಿ ಬಡುಕಿಬಿಡುವುದು
ನಮ್ಮ ಉಪಾಯ,
ಅಲ್ಲ ದೌರ್ಬಲ್ಯ!!!